“Die Rheinauen hatten och em Winter ehr Anziehungskraft nit verlore”

Von Toni Winter

Morjens wenn ich wach wood ,wor dä ezte Jreff an et Finster. Woren decke Iesblome drop, dann wor die Freud jroß. Domols joof et die moderne Isolierverjlasung noch nit. All die schöne Wasserfläche am Rhing woren zojefrore. Dä Hafe, die Krebbe,dat Schach, et Loch. En klen Iesstadion neven dem andere.Dann en Verbindung üvver dä Baach en et Broch.Dat Broch met all dä Wasserjräben die zojefrore wore und dä Reif en de Bäum wor wie em Märchenwald. Manchmol woren decke Iesscholle om Rhing, un wenn Huhwasser wor, endlose Iesfläche am Ufer entlang. Jetz wod et uns zo lang bis mer Ieshockey spille kunnte. Dat Ies mot evver jetestet wäde bevör mer uns die Schlittschoh anschnalle kunnte.Met enem Biffet wod usprobet ob dat Ies stark jenuch wor.Wo dä Name Biffet herkütt wesse nur die Sprachforscher. Mer wosten äver wie et jing. Fünf bis zehn Pooschte stalten sich nevenenander ob die Iesfläch. Et fing schon an zo kraache. Fertig los un dann em Laufschrett jradus. Dat Kraache wod zonehment lauter.Nur nit ömdrije denn henger uns wore Welle us Ies.Jetz darf keine zoröckblieve um nit enzobreche.Zum schwemme wor et jo zo kalt. Dat Ies hat die Strapatze üvverstande un wor no ein bis zwei Daach dragfähig. Üvveral wod Schlittschoh jelaufe. Knöppel woten afjemaat die Ähnlichkeit met nem Hockey hatte. Spazeerstöck woren och em Einsatz. Ersatz för dä Puck wor en Milchbüchs. Zwei Mannschafte hatte mer immer schnell zosamme. Mer woren schon jot enjespillt un trofen uns bal jeden Daach. Dä KEC hät wahscheinlich he ob de Krebbe udder om Loch ken Chance jehatt. Wenn mer Doosch hatte un naas jeschwees wore, wod einfach en Stöck Ies afjeklopp un en de Mul jestopp. Dovon jof et jo reichlich.Wenn dat Wasser am Rhing zoröckjing, loch dat Ies üvverall ob der Äd. Jetz wor Berg un Talfahrt anjesaat. Dat wor ävver nit unjefährlich weil üvverall Spalten wore. Die Schlittschoh wote an de Absätz anjeschruf. Wenn ene Absatz afjeresse wor, jof et derheim immer Ärjer. Ob Summer, ob Winter, et wor immer schön am Rhing.

Die em Oot ansässije Ziejeleie han sich em Broch dä nutwendije Lehm jeholt. Defe Jrave die mit klorem Wasser jeföllt wore sind dodurch entstande. Wasserplante aller Aat hatten sich üvverall verbreitet.Och verschiedene Aate vun Fesch kunnt meer he finge.Frösch wore reichlich vörhande. En jroße Ploch wore de Möckeschwärm. Die Jrave sind späder mett Schutt un Müll zojeschött wode. Jeder kunnt singe Müll do avlade. Ein Herr Jülich vun der St.Tönnisstroß, dät sich met Wasserplante befassen. Die jing dä em Broch holle un hät die an Zierfesch- Jeschäfte verkauf.

...........................

Toni Winter wurde 1930 in Worringen geboren. Im Jahre 2008 verfasste er diesen Artikel für das Heimatarchiv.

Heimatarchiv Worringen

Januar 2023